روايات وقصص

انترفيو الأحلام

— لأ؟

— أنا قبلت المهمة.

— دي مهمة تعجيزية.

— عارفة.

— يبقى سيبيها.

هزت رأسها.

— لو سبتها علشان حضرتك جيت، بكرة كلهم هيقولوا إني فعلًا موجودة هنا بالواسطة.

سكت عمر.

وبعدين سحب كرسي وقعد قدامها.

— فاضل قد إيه؟

— ساعتين تقريبًا.

خلع الجاكيت بتاع بدلته.

— تمام.

— تمام إيه؟

— هنخلصه.

— إحنا؟

— عندك اعتراض؟

— حضرتك مدير الشركة.

ابتسم.

— والنهارده مساعد محاسب.

لأول مرة ضحكت سلمى قدامه.

ضحكة بسيطة.

لكن عمر حس إن الصوت ده عمل حاجة غريبة جواه.

اشتغلوا سوا.

وبعد ساعة تقريبًا، سلمى وقفت فجأة.

— عمر…

كانت أول مرة تناديه باسمه من غير «حضرتك».

هو نفسه لاحظ.

— إيه؟

أشارت على رقم.

— نفس النمط.

قرب منها.

راجع الرقم.

ثم فتح صفحة تانية.

وثالثة.

ملامحه اتغيرت.

المبالغ اللي سلمى اكتشفتها في اختبار المقابلة موجودة هنا كمان.

لكن بصورة أكبر.

وأخطر.

قال عمر:

— سلمى… إنتِ عارفة الملف ده خاص بإيه؟

— لأ.

قلب الغلاف ناحيتها.

كان ملف حسابات أحد أكبر مشروعات الشركة.

مشروع قيمته مئات الملايين.

قالت ببطء:

— يبقى الفرق هنا مش بسيط.

عمر اتصل بحسام فورًا.

— تعالى حالًا.

بعد عشر دقايق، حسام وصل.

بدأوا يراجعوا.

وبحلول العاشرة مساءً، الحقيقة الأولية كانت واضحة.

فيه مبالغ كبيرة بتخرج من الشركة من شهور.

بطريقة منظمة.

والشخص اللي بيعمل كده عنده صلاحية للوصول لحسابات حساسة جدًا.

سلمى قالت:

— فيه حاجة مش فاهمها.

عمر:

— إيه؟

— الملف ده وصل لي إزاي؟

الثلاثة سكتوا.

بص عمر للملف.

فعلًا.

ليه مدحت تحديدًا اداها الملف ده؟

هل كان بيحاول يعجزها فقط؟

ولا كان متأكد إنها مش هتقدر تراجعه؟

وفي اللحظة دي، تليفون المكتب رن.

رفع عمر السماعة.

— ألو؟

صوت موظف الأمن جه متوترًا:

— أستاذ عمر… حصلت مشكلة تحت.

— مشكلة إيه؟

— مكتب الحسابات اتفتح بعد انتهاء الدوام.

وقف عمر.

— مين فتحه؟

— مش عارفين. بس فيه ملفات اختفت.

بص عمر لسلمى.

وسأل:

— أنهي ملفات؟

جاء الرد:

— الملفات الخاصة بالمشروع الكبير.

نزل عمر عينه للملف اللي قدامه.

نفس المشروع.

قال للأمن:

— اقفلوا كل مخارج الشركة. محدش يخرج.

قفل.

سلمى قالت:

— هو اللي سرق الملفات عارف إننا اكتشفنا؟

عمر ما ردش.

لكن حسام قال:

— أو عارف إن الملف الغلط وصل للشخص الصح.

وفجأة…

صوت رسالة وصل لتليفون سلمى.

فتحتها.

رقم مجهول.

مجرد جملة واحدة:

«كان المفروض تمشي من الشركة لما قالولك امشي.»

وشها اتغير.

عمر أخد منها الموبايل.

قرأ الرسالة.

وبعدين وصلت رسالة تانية:

«الجاكيت المخيط مش هيحميكي المرة الجاية.»

رفع عمر عينه لها.

الإعجاب اللي كان في نظرته اختفى للحظة.

وحل مكانه خوف حقيقي عليها.

قال بحزم:

— من اللحظة دي، إنتِ مش هترجعي لوحدك.

لكن سلمى كانت بتبص للرسالة وهي حاسة بحاجة أبرد من الخوف.

لأن الشخص اللي بعتها…

ماكانش عارف بس رقم تليفونها.

كان عارف تفاصيل اللي حصل في المقابلة.

وده معناه إن اللي بيراقبها…

كان موجود قريب جدًا منهم من البداية.

يتبع…

مرّت سنتين على جواز سلمى وعمر.

سنتين اتغير فيهم كل شيء تقريبًا.

سلمى بقت مسؤولة عن فريق كامل في إدارة المراجعة، وعمر التزم بوعده من أول يوم؛ عمره ما تدخل في تقييمها ولا ترقياتها، حتى لما مجلس الإدارة اختارها في مشروع كبير، كان أول واحد يطلب إنه مايحضرش التصويت.

أما البيت…

فكان هادي وبسيط بشكل غريب بالنسبة لراجل زي عمر.

سلمى رفضت يعيشوا في القصر القديم بتاع العيلة، وقالت له يومها:

— أنا مش عايزة أصحى كل يوم ألاقي خمسة بيسألوني أفطر إيه.

ضحك عمر:

— يعني المشكلة في الخدم؟

— المشكلة إني عايزة أدخل المطبخ الساعة اتنين بالليل أعمل نودلز من غير ما حد يحس إني بعمل ج/ريمة.

فاشتروا بيت أصغر.

وفي الصالة، وسط التحف الغالية اللي عمر جابها، كان فيه شيء واحد سلمى أصرت يتحط في مكان واضح.

ماكينة خياطة أمها القديمة.

كل ما عمر يشوفها، يقول:

— أنا المنافس الوحيد في البيت لماكينة خياطة.

فترد:

— وهي كسبانة لحد دلوقتي.

لكن صباح يوم الاثنين…

كل الهزار انتهى.

دخلت سلمى الشركة الساعة تمانية ونص.

أول ما وصلت لمكتبها، السكرتيرة قالت:

— فيه راجل مستني حضرتك من بدري.

— عنده ميعاد؟

— لأ.

— اسمه إيه؟

السكرتيرة اترددت.

— رفض يقول.

سلمى استغربت.

— أمال دخل إزاي؟

— قال إن الموضوع يخص الأستاذ عمر… ويخص والد حضرتك الله يرحمه.

سلمى وقفت.

— أبويا؟

دخلت غرفة الاجتماعات الصغيرة.

كان فيه راجل كبير، يمكن في أواخر الستينات، قاعد وظهره ليها.

قالت:

— حضرتك طلبتني؟

لف ناحيتها.

فضل يبصلها ثواني طويلة.

طويلة لدرجة خلتها تتوتر.

قال:

— شبهه.

عقدت حاجبيها.

— شبه مين؟

— أبوكي.

سلمى قربت.

— حضرتك تعرف أبويا؟

الراجل طلع ظرف قديم من شنطته.

وحطه على الترابيزة.

— أعرفه أكتر مما تتخيلي.

بصت للظرف.

مكتوب عليه بخط والدها:

«إلى عائلة المنشاوي.»

قلبها دق.

الخط ده مستحيل تنساه.

قالت:

— إنت جبت ده منين؟

رد الرجل:

— أبوكي ادهولي قبل ما يموت.

— وليه ماوصلتوش؟

نزل عينه.

— لأني كنت جبان.

سلمى بدأت تتوتر.

— حضرتك مين؟

رفع رأسه.

— اسمي صبري علام… وكنت مدير حسابات في شركة المنشاوي من حوالي عشرين سنة.

سلمى سحبت الكرسي وقعدت.

— وأبويا علاقته إيه بالشركة؟

صبري بص للباب.

— ممكن الأستاذ عمر يحضر؟

سلمى قالت فورًا:

— لأ. الأول أنا عايزة أفهم.

صبري سكت.

ثم قال:

— أبوكي اشتغل هنا.

سلمى ضحكت بعدم تصديق.

— مستحيل.

— حصل.

— أبويا كان بيشتغل في مخزن أدوية.

— في آخر سنين حياته، أيوه.

قرب الظرف منها.

— لكن قبلها كان محاسب هنا.

سلمى حسّت إن الكلام بيتقال عن شخص غير أبوها.

— عمره ما قال.

— لأنه خرج من هنا مكسور.

سلمى فتحت الظرف.

جواه صور قديمة.

وفي واحدة منهم…

والدها.

أصغر بحوالي عشرين سنة.

واقف قدام مبنى شركة المنشاوي.

وجنبه والد عمر.

سلمى حطت إيدها على بوقها.

— ده بابا فعلًا.

قال صبري:

— أبوكي كان واحد من أشطر المحاسبين اللي اشتغلوا هنا.

قلبت الصورة.

وراها تاريخ.

نفس السنة اللي والدها كان دايمًا يقول إنها أصعب سنة في حياته.

قالت:

— طيب ليه ساب الشركة؟

صبري أخد نفس طويل.

— لأنه اكتشف سرقة.

سلمى رفعت رأسها ببطء.

الكلمة رجعتها فورًا لأول يوم ليها.

الحسابات.

الفروق.

الشركات الوهمية.

قالت:

— سرقة مين؟

صبري قال:

— وقتها مكنّاش نعرف.

— ودلوقتي؟

سكت.

— دلوقتي أعرف.

سلمى قربت.

— مين؟

وقبل ما يرد…

الباب اتفتح.

عمر دخل.

— سلمى؟

بصتله.

— إنت عرفت إني هنا؟

— السكرتيرة قالت إن فيه شخص بيسأل عن والدك.

ثم بص لصبري.

ملامحه اتغيرت.

— حضرتك…

صبري وقف.

— إنت فاكرني؟

عمر قال:

— كنت بشوفك وأنا صغير. أستاذ صبري، صح؟

هز رأسه.

عمر بص للصور.

أخد واحدة.

شاف والد سلمى واقف جنب أبوه.

بص لمراته.

— ده والدك؟

هزت رأسها.

— طلع كان بيشتغل هنا.

عمر رجع يبص لصبري.

— ممكن تشرح؟

صبري قال:

— من حوالي عشرين سنة، والد سلمى اكتشف اختلافات في الحسابات.

عمر وسلـمى بصوا لبعض.

صبري كمل:

— نفس الأسلوب تقريبًا اللي سلمى اكتشفته بعد سنين.

سلمى همست:

— تحويلات صغيرة متفرقة؟

صبري اتصدم.

— إنتِ عرفتي منين؟

عمر رد:

— لأنها هي اللي اكتشفت التلاعب الأخير.

صبري فضل باصص لسلمى.

ثم ضحك بحزن.

— سبحان الله.

سلمى قالت:

— كمل.

— أبوكي حاول يبلغ الإدارة. لكن قبل ما يقابل والد عمر، حد سرّب معلومة إنه اكتشف الموضوع.

— وبعدين؟

— اتحطت فلوس في حسابه.

سلمى قامت.

— إيه؟

— مبلغ كبير اتحول لحسابه، وبعدها اتهموه إنه هو اللي اختلسه.

سلمى هزت رأسها.

— لأ.

— عارف.

— أبويا عمره ما يسرق.

— وأنا عارف.

عمر قال:

— وأبويا؟

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى